კიევი: 90 წლის ასაკში შოტლანდიელი მსახიობი და პროდუსერი სერ ტომას შონ კონერი გარდაიცვალა.
შონ კონერი პირველი მსახიობი იყო, რომელმაც ჯეიმს ბონდის საკულტო ფილმების სერიაში მთავარი გმირის როლი შეასრულა.
შონ კონერი არაერთხელ იყო ნომინირებული "ოსკარის“ პრემიაზე და ეს პრესტიჟული ჯილდო მას წილად ხვდა 1988 წელს, მეორე პლანის როლის შესრულებისათვის ფილმში „ხელშეუხებელნი“. მსახიობმა ორჯერ მოიპოვა ბრიტანული კინოპრემია BAFTA და სამჯერ - „ოქროს გლობუსი“.
2004 წელს შონ კონერი აღიარეს „ცოცხალთა შორის უდიდეს შოტლანდიელად“. 2000 წელს ბრიტანეთის დედოფალმა ელისაბედ მეორემ იგი ბრიტანეთის იმპერიის რაინდად შერაცხა.
სამსახიობო კარიერის განმავლობაში კონერი მონაწილეობდა 70-ზე მეტ ფილმში, მათ შორის "მკვლელობა აღმოსავლეთის ექსპრესში", "ინდიანა ჯოუნსი და უკანასკნელი ჯვაროსნული ლაშქრობა", "რობინ ჰუდი: ქურდების უფლისწული", "მთიელი" და სხვა.
შონ კონერმა ნახევარსაუკუნოვანი კარიერა 2003 წელს დაასრულა.